Луина алғаш рет ана атанбақ! Бомонд бас қосқан кештердің бірінен әншіні осындай әдемі көріністе байқап қалдық. Дүниедегі ең сұлу әйел – жүкті әйел демекші, Лу ханымның бақыттан балбұл жайнап жүргенін байқауға болады. Ендеше, Луина мен Артемді жағымды жаңалығымен құттықтаймыз.

Ал танымал вайнер, «Yuframe» ұжымының аруы Карина Оксукпаева дүниеге шекесі торсықтай ұл әкелді. Екінші рет ата-ана атанған Карина мен жары Арман Юсупов, атұстарларына Тимур есімін берген. Айта кетерлігі, вайн жұлдыздарының Әлім есімді тұңғыш ұлдары бар.

Актер әрі режиссер Сәбит Әбдіхалықов М.Әуезов атындағы Қазақ Мемлекеттік академиялық драма театрының директоры қызметінен кетті! Естеріңізге сала кетейік, Әбдіхалықов басшылық қызметке 2018 жылдың желтоқсан айында тағайындалған еді. Театр баспасөз хатшысының хабарлауынша, Сәбит мырзаның директорлықтан кетуіне денсаулығы себеп болған.