«Карусель», «Больно, но мало», «Если это сон» сынды талай хиттердің орындаушысы V $ X V PRiNCE алғаш рет өзінің ауқымды ән кешін өткізді! Тырнақалды трегін 2015-ші жылы ұсынған рэпер, ғаламтор арқылы танылып, жастар арасында үлкен сұранысқа ие болды.
Талай жыл өнерде жүрсе де, Асха бұған дейін ауқымды концерт өткізбеген еді. Кешке келген жанкүйердің көптігінен, ине шаншыр жер қалмады. Бұл күні 5000-нан астам халық жиналды.
V $ X V PRiNCE, рэпер:
- Дайындық где-то бір ай болды. Бүгін полдаут, бүгін аншлаг, бүгін бәрі керемет, бүгін даже қар жауды.
Дәл осылай ағынан ақтарылған Асха, бұған дейін сұхбат беруден мүлде бас тартатын. Эстрада жұлдыздары сынды, халық көзіне жиі түспесе де, рэпердің жанкүйері жетерлік. Тіпті, отандық кей әншілердің өзі дәл осылай аншлагпен кеш өткізе алмайтыны көпке жасырын емес.
Ал Асха Принцтың шын есімі - Асхат Расыбеков. 30 жастан асқан өнерпаз бала күнінен бастап рэппен айналысып келеді. Хип-хоп орындаушыдан жетістігінің сырын сұрайтындар көп көрінеді.
V $ X V PRiNCE, рэпер:
- Интернеттен көп адам кеңес сұрайды. Бірақ ол ондай кеңес қалай айтасың. Былай істе былай істе деп. Оны айта алмайсың ғой. Әр адам өзі осыған өзі келеді. Бірдеңе істейді, талпынады там. Әйтеуір бірдеңеге келеді ғой өзі.
Музыканттар арасында «VERNЫЙ» командасының негізін қалаған Асха Принцтың тректері бүгінде «iTunes» музыкалық чартында топ жарып жүр. Әсіресе, ТМД елдеріне танылған рэпердің соңғы «KNCNTRT» альбомы көптің көңілінен шықты. Бұл тек биылғы жылдың бастамасы деген Асхат, тыңдармандарына су жаңа 2 бірдей үнтаспа әзірлеп жатыр.
- Мына концерт өткен соң ровно бір аптадан кейін сразу же Россияда концерттер болады. Ары қарай план көп. Осы жылы тағы да Құдай қаласа 2 альбом шығарамыз. Бәрін көресіздер ғой.
Асха Принц бұл кеште жалғыз болмады! Музыкантқа Шоу Ирины Кайратовны, Baller, Ghetto Dogs, Darkhan Juzz, Hiro және Tanir и Tyomcha сынды өнердегі әріптестері қолдай көрсетті. Тіпті, рэпер Cali Ресей елінен арнайы ат терлетіп келген.
CALI, рэпер:
- Мен Асхатпен бұрыннан таныспын. Басымыздан не өтпеді. Мен оны өзімнің баурымдай көремін. Біз талай жыл бір шаңырақ астында тұрдық. Мені керек болса тәрбиеге де салды, қанша дегенмен ол менен үлкен, Асхатты қатты құрметтеймін.
TANIR, музыкант:
- Біраз уақыт болды. 2009-шы жылдан бері Асхатпен араласамыз. Сол уақыттан бері бірге рэп оқып жаттығатын едік. Асхаттан үйренетінім көп. Себебі, ол өте талантты музыкант.
Айтпақшы, Асха Принцтың алғашқы ауқымды концертіне анасы да келген еді. Бұл кеш көпке дейін халық есінде қалары сөзсіз.
V $ X V PRiNCE, рэпер:
- Ешқашан тастамаңдар істеп жатқан заттарыңды до конца істеңдер. Сол кезде бәрі болады.
