Отандық кинопрокатта кассалық табысымен топ жарған туындылар тізімі анықталды! «Ticketon.kz» сайтының мәліметінше, өткен уик-эндте ресейлік «Мұз 2» лентасы көш бастады.

Көрермендерімен қайта қауышқан спорттық драма айналымдағы екінші аптада 35 млн теңгеден аса пайдаға кенелген. Фильм сюжеті Александр Петров және Аглая Тарасованың сомдауындағы қос ғашықтың үйленіп, қызды болуынан басталады.

Жас отбасының тұңғышы да мәнерлеп сырғанаушы атануға бел буады. Картина дәл осы кішкентай қыздың спорттағы алғашқы қадамдарын баяндайды.

Әйгілі актер Джим Керри басты рөлді сомдаған «Соник» картинасы 31 млн теңгемен екінші сатыға жайғасты. Фильм өзінің жылдамдығымен танылған «SEGA» ойындарының кейіпкері – кірпінің бастан кешкен хикаясы туралы.

Соник өзге ғаламшардан жерге тап болады. Оның осындай ғажап күшін көрген зұлым дәрігер кірпіні өз уысына түсіру үшін барын салады.

Ал «Джентельмендер» детективті комедиясы 20 млн-ға жуық кіріс көріп, ТОП үштікті түйіндейді. Атақты режиссер Гай Ричи таспалаған тың туындыда Мэттью МакКонахи, Хью Грант, Колин Фаррелл және Генри Голдинг сынды голливудтың актерлары бой көрсеткен.

Сюжет желісі бойынша Оксфорд университетінің үздік түлегі ақсүйектер ортасына түседі. Ол қулығының арқасында есірткі бизнесін дамытпақ болады. Алайда кейіпкердің бұл әрекетін детектив әшкерелеп, бөгет жасамақ болады.