Америкалық рэпер Pop Smoke-ты күні кеше бұзақылар өз үйінде атып кетті. Алған ауыр жарақаттары мен дөп тиген бірнеше оқтың салдарынан ол оқиға орынында қаза тапқан. Естеріңізге сала кетейік, 20 жасар рэп орындаушысы өткен жылы 20 миллион қаралым жинаған «Welcome to the Party» әнімен әлемге әйгілі болған еді. Тергеу жүргізіп жатқан құқық қорғау органдарының қызметкерлері әлі қылмыскерлерді құрықтамапты.

Мадонна кезекті қуанышын дүркіретіп атап өтті! Оның «I Don't Search I Find» әні «Billboard Dance Club Song» чартында елуінші рет біріншілікті алып, көш бастады! Кеш барысында 61 жастағы поп-орындаушы, 25-ке жаңа толған биші Ахламалик Уильямстың қасынан ұзамай, оған махаббатқа толы көздермен қараумен болды. Жанкүйерлері екеуін әлдеқашан жұптастырып қойған. Бірақ Мадоннаның өзі әлі бұл жайлы ештеңе айтпады.

Элайджа Вуд алғаш рет әке атанды! 39 жастағы актер мен оның продюсер жары Метте-Мари Конгсвед балалы болуды көптен бері армандап жүрген еді. 2017 жылы шаңырақ көтерген олар тіпті сәби асырып алмақ болып ниеттеніпті. Жұлдызды жанұя жұрттан көпке дейін балалы болатындарын жасырып келгенге ұқсайды. Бірақ қуанышы қойынына сыймаған Вуд жағымды жаңалығымен бірінші болып әлеуметтік желіде бөліскен.