Британдық New Musical Express басылымы шоу-бизнес өкілдерін бір сахнаға жинады! Журнал әдеттегі дәстүр бойынша үздік муызканттарға өз жүлдесін табыстады. Еске салсақ, лауреаттар оқырманның дауыс беруі арқылы таңдалады. Одан бөлек, марапаттың мүсіншесі де ерекше – ортаңғы саусақ пішімінде. Ұйымдастырушылар бұны әділетсіз өтетін түрлі сайыстарға жауап деп түсіндіреді.

Ал дәл осындай оғаш пішімдегі жүлдені бірінші болып қолтықтап қайтқан Тейлор Свифт. Бикешке «әлемдегі ең үздік соло орындаушы» аталымы бұйырған.

Тейлор Свифт, әнші:

– Ең әуелі NME марапатына алғыс айтамын. Не деймін енді, мына мүсіншені ас бөлмесіне қойып қоямын. Мені ренжіткен біреу болса, осыны көрсетемін.

Ал Lana Del Rey «әлемдегі ең үздік альбом» иесі атанса, Billie Eilish «Bad Guy» трегімен «әлемдегі ең үздік ән» жүлдесін еншіледі. Алайда, қос орындаушы да шараға қатыса алмады. Сондықтан, өнерпаздар алғыстарын видео арқылы жеткізді.

Әлемге әйгілі «Nirvana» тобының көшбасшысы Курт Кобейнның асыл жары да бұл кеште назарсыз қалмады. Актриса әрі рок-әнші Кортни Лавқа «Икона» марапаты табысталды.

Кортни Лав, актриса, әнші:

- Шынымды айтсам сене алар емеспін! Көп рахмет бәріне! Мәртебелі атақты еншілеймін деп еш ойламадым.

Қысқасы, бұл кештен құр алақан қайтқандар кемде-кем! Көңілді марапат шараға жиналған өнерпаздардың әндерімен жалғасын тапты.