Кино индустриядағы ең шоқтығы биік сайыс - «Оскар» жүлдесі санаулы күннен кейін, өз иелеріне табысталмақ! Голливуд жұлдыздарының бірі шараға не киемін деп бас ауыртса, марапатқа үмітті атанғандар жанын шүберекке түйіп отыр. Айтулы шараны ұйымдастырушылар да, қызу дайындыққа кіріскен.

Еске салсақ, марапат биыл да жүргізушісіз өтпек. Америка киноакадемиясы өткен жылы бұл үрдістен бас тартып, нәтижесінде кештің рейтінгі едәуір өскен еді.

Алайда, қаралымы жағынан рекорд орнатып, жоғарғы рейтинге ие болу үшін ұйымдастырушылардың барған қулығы бұл ғана емес. Мәселен, кинокештің көркін Билли Айлиш қыздырмақ. Одан өзге, шарада ән шырқауы тиіс орындаушылар тізімін Элтон Джон, Идина Мензелдар жалғайды.

«Оскар» қызықтары мұнымен шектелмейді! 3 ақпан күні киносайыстың «Twitter» прақшасында ерекше жазба жарияланып, кейіннен өшіріліп тасталған. Онда «үздік фильм» - «Паразиты» картинасы, «үздік режиссер» - Сэм Мендес, ал актерлар арасынан мүсіншені Хоакин Феникс, Рене Зеллвегер, Брэд Питтер еншілейтіні мәлімделген.

Ал аталмыш жазба хакерлер әрекеті ме, әлде шындық па әзірге белгісіз. Не де болса, бұл сауалдың жауабын 10-ақпан күні білмекпіз!