«Жұлдызды айқастың» жалынды жанкүйерлеріне жағымды жаңалық! Көптен күткен картинаның кейіпкерлері, Чикагода бас қосты. Фантастиканың тизерін ұсынған киногерлер, лентаның қашан жарыққа шығатынын мәлімдеді.

Көптен күткен фантастиканың трейлерін киногерлер ерекше кездесу барысында ұсынуды жөн көрді. Себебі, аталмыш лента 1977 жылы бастау алған саганың соңғы нүтесін қоймақ. Сондай-ақ кеш барысында, фантастиканың «Жұлдызды айқас: Скайуокерлер көтерілісі» атауына ие болғаны белгілі болды.

Джеффри Джейкоб А́брамс, режиссер:

- Аталмыш лента тоғыз картинаның мәресі болғандықтан, түсірлім ұзақ уақытқа жалғасты. Ақырғы фильм өте әсерлі шыққанын қаладық.

Лентадағы оқиға желісі 2017 жылы жарық көрген «Соңғы Джедай» фильмінен соң өрбиді. Трейлердегі Рэй мен Лея ханшайымның құшақтасқан сәті көпшілікті әсерлендіргені сөзсіз. Себебі, бұл Лея образындағы Кэрри Фишердің дүниеден өтер алдында төбе көрсеткен ең соңғы картинасы.

Дейзи Ридли, актриса:

- Бұл бөлім Кэрри үшін де, барлығымыз үшін де соңы болмақ. Меніңше, лентаны әсерге толы қылып аяқтау қолымыздан келген сияқты.

Алайда, фантастикалық сага өз мәресіне жеткенімен, «Жұлдызды айқас» жобасы көппен қоштаспайды. Продюсерлер киноәлемді бұдан-былай телевизия саласында дамытатынын жеткізді. Мұндай мәлімдеме лентаның жалынды жанкүйерлерін де бейжай қалдырмады.

«Жұлдызды айқас» жанкүйері:

- Толқу үстіндемін. Кейіпкерлердің барлығына не болады, фильм немен аяқталады дегендей.

«Жұлдызды айқас» жанкүйері:

- Мен үшін бұл «Жұлдызды айқастың» соңы емес. Себебі, фильм аяқталса да, «Жұлдызды айқас» жобасы өз жұмысын ары қарай жалғастыра береді.

Ал, «Жұлдызды айқас: Скайуокерлер көтерілісі» желтоқсанның 20-сы көрерменге жол тартпақ!