Ресейдің еңбек сіңірген әртісі – Зара ғаламторға тәуелді екенін жасырмайды. Алайда, әнші желідегі уақытын құр-бекер емес, жанкүйерлеріне жауап жазуға жұмсайды екен. Олардың арасында қазақстандық тыңдармандар жетерлік дейді әнші.

Зара – қазақстандық тыңдарманның сүйіктісі! Өнерпаздың желідегі парақшаларында отандастарымыздың қалдырған жазбасына қарап, дәл осылай айтуға негіз бар. Ресейлік әншінің де, жерлестерімізге деген сезімі шынайы.

Зара, әнші:

-Ыстық ықыласы мен жылы сөздерін аямайтын қазақстандық жанкүйерлеріме алғыс айтамын. Мен негізі олармен желі арқылы жиі тілдесіп тұрамын. Көбінесе ізгі тілектерін білдіріп жатады.

Жылы сөздермен қатар, әншіге түрлі сауалдар түсіп жататын көрінеді. Солардың бірі – әншінің сұлулық құпиясына қатысты. Сырт келбетімен талайды тамсандырған Зара, көптің көкейіндегі сұраққа камера алдында жауап беруді жөн көрді.

Зара, әнші:

-Әртісті халық сүйсе, оның үйінде жақын жандары тосып отырса, соның барлығы оның сырт келбетіне әсер етеді. Ал, физикалық тұрғыда айтатын болсақ, дұрыс тамақтану, уақытысымен ұйықтау және спорт өте маңызды. Сондай-ақ, болмашы нәрселерге қуана білу керек.

Зараның шығармашылығында да жаңалықтар жетерлік. Ресейлік әнші, жалынды жанкүйерлеріне арнап ереше тарту ұсынбақ.

Зара, әнші:

-Жаңа екі альбом әзірлеп жатырмын. Бірі эстрадалық әуендерден құралса, екіншісі этникалық әндерден тұрады. Одан бөлек, жақында үлкен турға аттанамын. Ресей мен Израильдің қалаларын араламақпын.

«Ал, сәтін салса, жеке кешіммен Қазақстанға да келіп қалуым әбден мүмкін», - дейді әнші.