Әнші Зейн Малик табынушыларынан қолдау күтіп жүр. Себебі музыкант, сүйіктісі Джиджи Хадидпен қарым-қатынасын біржолата үзді. Голливудтың әдемі жұбы болған жұлдыздардың қош айтысуына не себеп?

4 жылдан бері бірнеше мәрте айрылысып, қайта қосылған Зейн Малик пен Джиджи Хадид қарым-қатынасына нүкте қойды. Жұлдызды жұп біраз уақыттан бері бір шаңырақ астында тұрған. Алайда, Зейннің тығыз жұмыс кестесі мен жұмбақ жүрістері сәнбикенің ашуына тиді. Сүйіктісінен көңілі қалған бикеш, енді қайта қосылуға мүмкіндік бермеймін деп отыр.

Софи Тёрнер мен сүйіктісі Джо Джонас келісімшартқа отырды. «Тақтар ойыны» телехикаясында басты кейіпкердің бірін сомдайтын актриса, ғашығына туындының қалай аяқталатынын жайып салған көрінеді. Софидің бұл қылығынан кейін, жоба авторлары «Jonas Brothers» тобының мүшесі Джоға қатаң талаптар қойған. Музыкант енді әйгілі сериал жайлы білетін мәліметті құпия ұстауға міндетті.

Рианнаның басы дауға қалды. Оған әншінің «Fenty Beauty» атты жеке бизнесі себеп болып отыр. Өнерлі арудың қыздарға арналған соңғы косметикасының атауы, көпшіліктің көңілінен шықпаған. Олар Ририді «Geisha Chic» опа-далабы арқылы нәсілшілдік мәселесін қозғады деп айыптауда. Енді, Рианна бұл туындысын сатылымнан алып тастамақ.