Күллі әлемді бағындырған Ариане Гранде енді үздіктердің қатарында емес. Әнші қызды, талантты жас орындаушы Билли Айлиш басып озды. 17-ге енді толған өнерпаз, алғашқы альбомымен жаңа рекорд орнатқан.

Билли Айлиштің су жаңа әнжинағы АҚШ-тан бөлек бес бірдей мемлекеттің музыкалық чартында көш бастап тұр. Ерек образымен көзге түскен бойжеткеннің тректері үздік ондыққа енген. Альбоммен қатар «bad guy» әніне бейнебаян ұсынған Билли, бір тәулікте 7 млн қаралым жинап, youtube платформасының тарихына енді. Өнерпаздың альбомына 800 мың тыңдарман алдын ала тапсырыс берген екен.

Сиара да жуырда табынушыларын кезекті үнтаспасымен қуантпақ. Әнші «Beauty Marks» атты альбомына енетін алғашқы «Thinkin Bout You» трегіне клип түсірді. Сиараның тың видеосы, ерке қыздың өмірін суреттеген. Биші ретінде де танылған бикеш, клипінде бар қабілетін паш етті.

Ал Камила Кабейо испан елінің әншісімен дуэт құрды. Өнерпаз ару, музыкант Алехандро Санзамен бірігіп «Mi Persona Favorita» туындысын шырқаған. Камила мен Алехандроның бейнебаянына шынайы ғашықтардың махаббат хикаясы арқау болған.