Димаштың шетелдік әріптестері Бруно Марс пен Карди Би болса, тыңдармандарын ұзақ күттірмей жаңа бейнебаян ұсынды. Үздік дуэт атанған бұл қос өнерпаздың тың туындысы, 25 млн-нан аса қаралым жинап үлгерген.

Карди Би мен Бруно Марс «Please Me» трегіне су жаңа бейнебаян таспалады. Үш апта бұрын жарық көрген ән, бірден музыкалық чарттардың көшіне ілінген. Қос өнерпаз тың туындыда – арнайы би жарысымен ерекшеленуді көздегендей.

«Jonas Brothers» тобы 7 жылдан кейін қайта табысты. Кевин, Джо және Ник есімді үш бауырдан тұратын ұжым, сахнадағы өнер жолын жалғастырмақ. Поп-рок жанрында ән шырқайтын бойзбенд, ұзақ үзілістен кейін «Sucker» әніне клип ұсынды. Видеоға Джо өзінің ғашығы Софи Тернерді түсірсе, Ник жұбайы Приянка Чопраны да шет қалдырмаған.

Бейонсенің сіңілісі Соланж Ноулз да тыңдарманын сағындырған еді. Әнші қыз ел күткен «When I Get Home» атты үнтаспасын жарыққа шығарды. Әнжинақта – хип-хоп пен электронды музыка тоғысқан. Бикештің бұл туындысы бүгінде АҚШ пен қоса Ұлыбританияда үздік деп танылуда. Соланж енді сәуірде өтетін «Coachella» фестивалінің қадірлі қонағы болмақ.