Рами Малекке кинодағы жалғыз рөлі тек танымалдылықты ғана емес «Оскарға» жолдаманы қоса сыйлады! Әйгілі Фредди Меркьюридің образын сомдаған ол, «үздік актер» атануы әбден мүмкін. Оның үстіне, кіл мықты киногерлер бірауыздан өнерпазды жеңіске лайық деп санауда.

«Богемдық рапсодия» жетістікке жетелейтінін Рами күні бұрын сезгендей. Ол, продюсер Грэм Кингтен бұл рөлді аттай қалап сұрап алған. Киногерлер де актер таңдауда аздап қиындыққа ұшыраған сәт еді. Осылайша Фредди Меркьюри образын сомдауға, тегі мысырлық Малек сай келе қалған.

Рами Малек, актер:

-Фредди Меркьюридің образын сомдау – өте қиын болды. Өз-өзіме осы рөлді алып шыға аламын ба деп сұрақ та қойдым. Оның үстіне Фреди ерекше адам. Соның барлығын көрсете білуім керек еді.

Рамидің төккен тері зая кетпеді. «Богемдық рапсодия» 2018 жылы - ең көп талқыға түскен туындылардың біріне айналды. Одан бөлек жаһандық прокаттан 800 млн доллар жинаған лента, «тарихтағы ең табысты байопик» ретінде біраз киногердің өзін таңқалтқаны бар.

Брайан Мэй, Рожер Тейлор, «Queen» тобының мүшесі:

-Фильмді тамашалап, ерекше күй кештік. Рами арқылы Фреддиді көріп тұрғандай болдық. Ол актер ретінде Фреддидің барлық қасиеттерін өзіне сыйғыза білген.

«Фредди Меркьюри - Рами Малек үшін «Оскарға» жол ашты», - дейтіндер де көп. Бұл пікірмен келіспеу әсте мүмкін емес.

Мэтью Беллони, The Hollywood Reporter бас редакторы:

-Рами телевизиядағы мықты актерлардің бірі. Бірақ, оның бағын ашқан - «Богемдық рапсодия». «Алтын глобус» иемденіп, фильм миллиондаған табыс жинады, енді міне «Оскарға» үміткер. Меніңше Рамидің бұл жүлдені жеңіп алуға мүмкіндігі мол.

Бұл болжамның қаншалықты рас екені санаулы күндерден кейін белгілі болмақ. «Оскар» жүлдесі ақпанның 25-ші жұлдызында табысталады.