Әнші қыз «7 rings» трегіне арнап денесіне сурет салдырған еді. Қырағы жанкүйерлері татудағы жазулардың қатесін байқап, бикештің бетіне баспақ болады. Алайда, өнерпаз ұялудың орнына, олқылықтың арқасында қалтасын қалыңдатпақ ниетте!

Ариане өзінің денесіне салдырған «7 rings» тіркесі сәтсіздеу шықса да өкпелі емес. Себебі, ару татудың пайдасын да білгендей. Жапон тілінде қате жазылған бұл сөзді кетірмес бұрын, Грандеге жарнамалау жайлы ұсыныс түскен. Бикешке арнайы фотосессия үшін 1,5 млн доллар ақы уәде етіліпті. Әнші мұндай мүмкіндіктен бас тартпаймын деп отыр.

***

Крис Прэтт екінші мәрте үйлену тойына қызу дайындыққа кірісті. Актер, Арнольд Шварценеггердің қызы – Кэтринмен бірнеше айдан бері көңіл қосқан еді. Сүйіктісімен отау құруды қалаған Крис, енді болашақ қайын атасының келісімін де алған.

Арнольд Шварценеггер, актер:

-Мен қызымның бал-бұл жайнағанын көріп, бір марқайып қалдым. Кристі өз баламдай жақсы көріп кеттім. Сондықтан балаларымның бақыты - менің бақытым. Оларды қолдауға міндеттімін.

***

Джейсон Момоа «Форсаж» франшизасына қосылмақ. Актерге, Дуйэн Джонсонның өзі әйгілі кинотуындыда бой көрсетуін өтінген. Авторлардың сөзінше, «Хоббс пен Шоудың» кезекті хикаясында, Джейсон сынды кейіпкер ауадай қажет екен. Скала атыс-шабысқа толы су жаңа лентаның, алғашқы бөлімі көрерменнің көңілінен шықса, жалғастырамыз деген ниетте.